NBA季後賽一向有條不成文規例：當球賽去到最後階段，球證多數唔會響哨干預比賽，一切都交畀球員自行解決。周一西岸準決賽，雖然馬刺有阿域治（LaMarcus Aldridge）轟入全場最高嘅41分，都難阻球隊喺主場以97:98不敵雷霆，場數被扳平1:1。
雷霆嘅韋達斯（Dion Waiters）喺最後13.5秒開邊線球嗰陣，點都避唔開面前嘅真路比利（Manu Ginobili），於是佢就開踭撞落呢位38歲老將嘅心口，然後趁機傳波畀隊友，當時企正喺韋達斯隔籬嘅球證亦冇打算吹雞判進攻犯規。馬刺教練普波域治（Gregg Popovich）賽後就話覺得呢球肯定係有問題，就連名宿「魔術手」莊遜（Magic Johnson）都忍唔住喺twitter話呢個係NBA史上最過份嘅漏判！而主球證Ken Mauer賽後都即時認錯，話呢球應該判韋達斯進攻犯規；而且後者開波時跳起亦都算係違例。
真路比利拒賴地硬
不過韋達斯之後就反駁，話真路比利當時踩咗出邊線，球證都冇吹罰佢技術犯規，而球證都承認自己睇漏眼。真路比利賽後坦言：「我認為韋達斯有犯規，不過呢個亦唔係我哋輸波嘅藉口。因為最後我哋都偷到波，攞番個控球權，但係球隊把握唔到最後一擊。」
季後賽球證頻漏判
今年季後賽不時出現球證漏判問題，就好似周日東岸首圈「搶七」大戰中，溜馬喺最後16.6秒落後速龍三分嗰陣，保羅佐治（Paul George）想傳波畀馬軒美（Ian Mahinmi）「拆你屋」，點知速龍後衞迪洛桑（DeMar DeRozan）從後推開馬軒美，當時球證又冇吹，而NBA賽會事後亦承認呢球係漏判。