要喺股票市場上捕捉一隻如李斯特城嘅神級大冷股票，要配合好多因素。而李城故事當中，有一個重要啟示，爆冷股必然要出現錯價。
李城上季大部份時間包尾，但最尾9場，7勝1和1負，呢段戰績絕對係前列份子嘅表現；季初前李城斥資超過3,000萬鎊擴軍，經費多過一般弱旅，可見基本因素進一步改善。原來季初已經睇到隊波嘅轉捩點，馬後炮講句，咁嘅情況都賣1賠5,000，絕對係錯價。
人生之中較深印象嘅「李斯特城」，係小弟之前講過、2008年行街時發現I.T（999）進入寡頭壟斷市場地位，事實上小弟冇即刻買I.T，因資金機會成本高，買一隻全世界睇淡嘅股票，若佢唔升，得你冇得賺，你輸晒時間值，都好大鑊。事後檢討冇低位買I.T是無可奈何，下次醒目啲，應該將呢類股一直備忘，等呢隻「李城股」走勢改善之初，就要追入。
慧眼識英雄固然夠英，但小弟買股都係為贏錢啫，唔係為咗型，與其喺冇靚圖、全民睇淡時，冇把握地去博隻大冷門，倒不如等靚圖出現、有把握地買半冷門股仲好，發現冷門好股時，應該要先備忘，等走勢對辦、成交配合才追入。
至於港股，恒指咁多壞消息之下插近400點，總之採取觀望態度，繼續視今次跌浪為港股承接力嘅測試，呢一浸跌多跌少，將來都會帶來機會。
晉佳
http://facebook.com/advanceguy1