和黃前大班馬世民（Simon Murray）自住多年嘅赤柱東頭灣道分層豪宅，市場指，放盤一年後跟隨大市回落，累積減價1,500萬元售出，成交價5,000萬元，呎價仍高企喺3萬元。
土地註冊處資料顯示，馬世民喺2001年以1,650萬元購入，換句話說，自住15年後，賬面賺3,350萬元，升值兩倍。
翻查資料，馬世民喺2001年購入東頭灣道39號B地下嗰層，同年向滙豐承造按揭，實用面積約1,656方呎。
聽地產代理講，馬世民因應市道回落，先後三次調整叫價，由最初叫6,500萬元，半年後減至5,800萬元，月前再減多500萬元，最後買家以5,000萬元購買呢間臨海豪宅。毗鄰39號C一樓，由特首梁振英持有。