【本報訊】李斯特城歷史性奪冠，本應引起本港一股李城球衣熱，惟球衣專門店負責人指，李斯特城球衣早在上年聖誕節已全線無貨，預計下一球季才會返貨。
旺角Kitroom Sports負責人Kan（圖）指李城球衣早在上年聖誕節已沽清，「主要係個香港代理冇入貨，所以就冇乜存貨；而且自季初李城表現就好好，所以多咗好多人嚟問有冇波衫，去到聖誕節就賣晒；今日亦都有客打嚟問，可惜我哋都只可以同啲客講冇貨」。
Kan又指前鋒9號「華dee」華迪（Jamie Vardy）、中場26號阿爾及利亞國腳馬列斯（Riyad Mahrez）及中場4號「飲水哥」真禾特（Danny Drinkwater）的球衣最受球迷歡迎。
記者昨致電今季贊助李斯特城的運動品牌PUMA查詢存貨，店員回覆指「係由我哋贊助嘅，不過今年香港門市冇入貨，所以我哋都冇貨」。記者於旺角一帶亦遍尋不獲，Kan指「相信連水貨版都幾難搵到」，又呼籲球迷小心在網絡錯買翻版球衣，建議球迷等代理商入貨才購買。
■記者葉偉東