騎士當家球星勒邦占士（LeBron James）一直都俾人認定係米高佐敦（Michael Jordan）嘅接班人，估唔到佢同「波神」嘅距離又近一步；周一有消息傳出佢將會出演《Space Jam》（太空也入樽）續集之外，喺NBA季後賽嘅得勝場數亦正式超越MJ！
喺1996年上映嘅《Space Jam》可以話係籃球電影嘅代表作之一，一眾球迷等咗20年，終於等到佢開拍續集！雖然球迷未知占士嘅演技可唔可以超越到MJ，但係可以肯定嘅係，佢喺NBA有樣嘢成功超越咗波神：占士喺周一場東岸準決賽Game 1交出準「雙雙」25分加埋九個助攻，帶領騎士以104:93擊敗鷹隊時，憑住120場季後賽勝仗，超越咗MJ嘅119場。
占士賽後仲大讚今場貢獻咗八分14個籃板嘅T湯臣（Tristan Thompson），話後者對於騎士嚟講，就好似洛文（Dennis Rodman）對MJ當年嘅公牛一樣咁重要㖭。