李斯特喺一日之內雙喜臨門！周一世界桌球錦標賽決賽，喺李斯特出生嘅「一哥」沙比，以總盤數18:14擊敗中國球手丁俊暉，繼2014年後再次捧起冠軍獎盃之餘，同時贏得33萬鎊（約376萬港元）獎金。
「一哥」沙比喺英國克魯斯堡劇院舉行嘅世錦賽決賽中，一度取得6:0嘅領先優勢，不過佢就話自己其實贏得一啲都唔輕鬆，因為小丁都畀咗好多壓力佢。不過沙比就認為小丁可能背負太多壓力先會失準：「丁俊暉係首位打入決賽嘅亞洲球手，我諗中國人對佢嘅期望好高，令佢有好大壓力。」
一度因李城封王難以集中
曾經喺2014年嘅世錦賽擊敗「火箭」奧蘇利雲奪冠嘅沙比，亦都成為繼戴維斯、亨特利、馬克威廉斯、希堅斯同奧蘇利雲之後，第六位喺克魯斯堡劇院兩度奪冠嘅選手。沙比對於自己可以同呢班球員並肩，亦顯得好興奮：「可以喺世錦賽兩度奪冠嘅球手，全部都係桌壇中嘅精英，好開心我有資格同佢哋相提並論。」
雖然賽前話會着李城波衫嘅沙比，最終都係走數，但佢捧盃嗰陣都即時舉起愛隊嘅隊旗補數。沙比賽後更坦言當佢喺比賽途中，現場有人話畀佢知熱刺賽和車路士，差啲令佢喺最後一節難以專心應付比賽：「當我知道呢個消息之後，我腦海不斷浮現李城封王嘅畫面，我要好努力先可以專心應付比賽。」
「雲尼亞里真係勁」
呢位32歲嘅李城死忠仲講笑話：「對於我嚟講，真係好難分出究竟李城封王，抑或我喺世錦賽兩度奪冠嘅消息震撼啲！」佢亦向愛隊送上祝賀：「喺英超封王真係一項難以置信嘅成就，領隊雲尼亞里同一眾球員真係好勁。」