甲一兩戰全勝嘅南華同福建，今晚八點八喺修頓相遇，啱啱再做老竇嘅南華助教李嘉耀話，對福建就小心佢哋嘅三分波，今場亦會用陳翊麟（圖左）等幾位後備試陣，目標喺部署下場對東方喎。至於福建教練安慶健話，南華實力平均，希望加強防守之餘，內線同外線都要好好配合。至於頭場七點由東方對飛鷹，東方主力李琪都唔敢睇小對手，希望隊友陳兆榮傷癒復出，發揮會好啲喎。賽事門票一律50元，另設長者及學生票30元，黃昏六點開售。