如果Viu TV嘅《跟住矛盾去旅行》邀請立法會議員林大輝（圖）做主角，到底同大輝出埠嘅拍檔，係特首梁振英定教育局局長吳克儉先更有火花？八方都諗唔掂，皆因大輝無論對住689抑或吳得掂，往往都好有火氣，肯定因為矛盾擦出火花。
深信吳得掂冇得留低
大輝日前接受張寶華嘅《最好的時光》訪問，談到對呢兩位「政治人才」嘅評價。對於CY，大輝讚佢「鬥志高昂」，喺特首跑馬仔賽事中「跑到斷氣都想跑」，而佢只要箍掂689票、即係上屆嘅得票就已連任在望，明言箍689票箒，「功夫唔係好難做」（暗寸少票啫！），與此同時慨嘆政改方案不獲通過，普羅大眾冇票投，市民明年3月（咪即係特首選舉期……）最好去旅行，皆因「無謂睇」。到底係讚定彈？大家心中有數！提起吳得掂，大輝就講得白好多嘞，話深信CY一旦連任，下屆政府班子一定會換走吳得掂，皆因冇人會想香港嘅教育出現「十年浩劫」。