新界東補選塵埃落定，候選人陸續要向選舉事務處提交選舉開支申報。以逾萬票敗於公民黨楊岳橋嘅民建聯副主席周浩鼎早前搶閘交咗，最終用咗161萬搞補選，以佢拎到15萬票計，換言之每票值11蚊；由於輸咗，點計肯定都係冇乜效益，好在有民建聯幫佢包底。咁以逾16萬票勝出嘅岳少，又使咗幾多錢？八方聽聞，岳少選舉開支約250萬，即係貼近呢次補選開支嘅近262萬上限，換言之每票約值15.6蚊。
就咁聽起上嚟，好似用咗好多錢咁噃，尤其同鼎得票相差近一萬，但開支就多咗近百萬？有公民黨中人話，使錢多梗係事出有因，皆因岳少有嘅競選活動，對手未必有搞，例如單係維園年宵檔嘅宣傳，已經用咗成13萬。
而更重要嘅係，初一發生咗旺角騷亂囉，因為成個補選形勢之後逆轉，岳少嘅競選工程要急急改主題，應付當時四方八面嘅抹黑攻勢（八方都記得，當時岳少因為向騷亂被捕者提供法律支援，而被左報等攻擊為『暴民律師』），唔多啲渠道澄清吓又點得？而撇除呢兩項，最大條數係選舉廣告，約152萬。
唔少網民都留言話岳少質素高，而且最終能夠勝出選舉，呢筆選舉開支算係物有所值。