喺中國武漢舉行嘅亞洲羽毛球錦標賽，佔有主場之利嘅世界一哥諶龍噚日喺男單決賽，以17:21、21:15、13:21，總局數1:2不敵世界第二嘅馬來西亞名將李宗偉屈居亞軍，除咗連續四次交手都唔夠「拿督」鬥，對上兩個比賽亦分別輸畀隊友林丹同港將伍家朗，繼續陷入超過半年嘅冠軍荒；嗰邊廂，李宗偉今年連同亞錦賽參加咗五個比賽，就已經拎到三個冠軍，世界排名積分家陣同諶龍只係相差約3,000分。女單就由王儀涵擊敗李雪芮封后。