幾乎每逢周日都會以Blog會友嘅財政司司長曾俊華，噚日又做鍵盤戰士，喺網誌話上周出席香港工業總會晚宴，討論到Made in Hong Kong呢個議題，話香港嘅工業上世紀60、70年代好蓬勃，「香港製造」成優質象徵，其後內地經濟改革開放，香港製造業生產線北移至珠三角地區，香港逐步轉型成以服務業為主嘅經濟體，但佢覺得香港工業仍然會喺未來經濟發展扮演重要角色。
當然，香港要踏上「再工業化」之路，唔係將勞動密集嘅低技術製造業搬返香港咁簡單，鬍鬚曾話係要結合高端科技，發展智能化、高技術嘅製造業，又話香港喺機械人技術、醫療儀器、資訊科技同物聯網穿戴裝置等方面都有不俗嘅基礎同發展潛力，而推動創新科技係財政預算案重點喎！