一位仁兄出席NEA（新聞行政人員協會）慶祝成立30周年晚會，話盛況空前咁講，佢自己從未見過有咁多政府高官及傳媒高層聚首一堂，MIRA酒店頂樓可話講得星光熠熠；現任特首梁振英，退任特首曾蔭權，現任司長、局長，過往及現任新聞處長有好幾位出席，連陳祖澤都俾足面，仁兄話：「好彩香港非常安全，在中東國家或甚至現時布魯塞爾，有齊咁多大官喺度，好容易成為恐襲目標，令政府癱瘓。」
咁大件盛事，本港報紙好少報導，唯獨是大公報有半版新聞，點解咁俾面？原來有中聯辦人員、全國傳媒代表專程來港到場，又有中聯辦張曉明題詞祝賀，可見得NEA江湖地位十足，愛國人士建制派大力拉攏，伸出友好之手。新聞行政人員嘅會員全是資深編輯及老總級，地位好高啫，姜國元如果平時多多出席呢類NEA盛會，佢嘅職業安全性或者會高一啲。
不過最精彩嘅圖片就唔會在報紙出現嘞。上述仁兄WhatsApp嚟一張圖片，上款係：賀新聞行政人員協會三十周年。下款係：全國政協常委胡定旭敬輓。
吓，咁都得？胡定旭咁好文墨，點會「敬輓」新聞行政人員協會呀？話唔定係花店或花檔唔識字，將「敬賀」寫為「敬輓」？呢筆手民之誤夠晒杰。難得嘅係，NEA負責人唔將個花牌收埋，反而大大方咁擺放在當眼處，任影唔嬲，非常有幽默感。不過呢，多口仁兄又諗到過晒龍，佢話：「NEA咁高調招呼權貴，形同接受統戰，當晚又由各大財團買枱籌款，不知是否自毀新聞獨立性，一個全國政協常委送花牌敬輓，有深意焉？」
左丁山聽罷，哈哈大笑，不相信有其事。中午飯局時將花牌圖片與一眾商界老友分享，無不莞爾，認為肥胡賀慶變贈興，都唔知係邊個嘅錯。一位在機管局有線路嘅朋友話：「呢樣可能係See Why症候群，可以將好事變壞事，小事變大事，大事變危機，例如機場行李，我嘅消息話，飛天朱無端端走出嚟嘈埋一份，正因為當日有人好嘈，令飛天朱看不過眼！」哦，仲以為飛天朱不甘寂寞，重出江湖㖭，72歲人仲咁好火，do you see why？明顯係有人好乞佢憎囉。