五一勞動節，想勞動一下。想打野戰，又落雨。好想打野戰，又話遠。真係好想打野戰，又叫痛。點算？有兩位年輕人，從外國引入這隻「Laser Tag」，室內玩，唔怕落雨。位處銅鑼灣，交通方便。用紅外線代替子彈，唔痛。仲等？立即開戰！
首先當然要穿上裝備，戰衣表面有四個感應器，隨便射中一個都會扣分。一般會玩三槍死，三秒復活。記者今次初體驗就一槍即死，三秒復活。槍有兩種模式，散彈模式射程較短，不過可以一次射中幾個敵人。遠距模式就方便你長距離狙擊敵人。
穿好裝備，聽過簡介就開始。房間內又黑又暗又有煙，不過戰衣會發光，所以唔怕睇唔清敵人。初學者無策略，純粹見人就射，追追逐逐，頗為爽快。12分鐘一局，以為好短？其實已經流晒汗。
同行記者，一人表示非常疲倦，又追又跑，差點斷氣。另一人就非常欣賞室內設計，避開蛇蟲鼠蟻，夠乾淨。開始前聲稱怕痛的女記者，竟然話中槍唔痛失去殺人動力，應該要睇心理醫生。另外一位女記者，覺得3秒後復活這設計非常好，死完又殺殺完又死，不用像真野戰，等完game再開始。
兩位年輕老闆，Zoe和Alan兩位年輕人，外國玩過這個遊戲之後，為之着迷，就索性引入香港。以為只有大人啱玩？原來很多小朋友都會來玩，借遊戲培養團隊意識，合作心態，跑跑跳跳，總好過躲在家玩《Division 》。
LASERMADS
收費：非會員 每局$118
會員每局$98，兩局$158
銅鑼灣怡和街2-6號英光大廈11樓
工廈室內飄移賽車
不喜歡打打殺殺，賽車又適不適合你？觀塘工廈內，又有另一班年輕人，引入美國電動玩具車，讓你玩飄移，玩花式。設有賽道讓你可以試車，賽道約籃球場大小，以車胎砌出四個彎道。
記者試玩，飄移其實不難，放膽去試十分鐘一定學會。你以為車仔細細冇料到，其實飄移時的離心力和速度感並不弱，絕對滿足到你。一班朋友你撞我，我撞你，扮扮拓海，又過一日。準備勞動節後，繼續勞動喇！
Crazy Cart
收費：周末假日每10分鐘$88，平日每10分鐘$79
地址：觀塘開源道75號業發工業大廈2期9樓
記者：李聰
