聽到「重啟政改」呢四粒字，係咪以為出自泛民主派陣營？錯，噚日力促重啟政改嘅其實係身兼港區人大代表嘅新民黨副主席田北辰，佢喺電台節目話喎，港獨、自決同驅蝗等現象，都係源於市民不滿「政府揸fit超然地位呢個人」，因大部份市民都無法影響到嗰1,200個選舉委員會委員，換言之喺選特首上冇say，自然唔like，要解決「特首係同我哋無關」嘅問題，方法之一係重啟政改。
田二少仲話，唔少年輕人認為「一國」越嚟越強，「兩制」就越嚟越弱，所以需要特首代表社會聲音，而如果，真係如果咋，特首係由普選產生，就會更願意聽市民聲音、考慮社會觀感，相信行李門事件都唔會發生。全國人大委員長張德江月中訪港，唔知田二少有冇機會向委員長表明現時既超然又離地特首極惹市民反感呢？