距離立法會選舉仲有4個月，各黨派你爭我奪嘅黨內紛爭陸續爆發，部份不和更浮面，好似民主黨（白鴿黨）咁，該黨嚟緊打算派出經常就反貪、反圍標議題出聲嘅總幹事林卓廷出戰，搞到黨內、尤其都等住上位嘅人不滿，喺內部會議質疑點解阿廷霸住總幹事個位又要參選？未出戰就先面對黨友狙擊嘅阿廷就話，不滿佢嘅只係個別人士，會繼續向黨友解釋，爭取支持。
保皇黨偷笑食花生
白鴿黨早前舉行特別黨員大會，投票推薦各區出戰人選，新東今屆有3人參與黨內初選，包括經常曝光講反貪污、反圍標嘅總幹事林卓廷、大埔區議員區鎮樺，以及變性人梁穎恩，結果林卓廷勝出黨內初選。
據悉，區鎮樺同東區區議員趙家賢都不滿林卓廷霸住總幹事一職，質疑佢以總幹事身份掛名參選，有利益衝突。阿廷就同八方講，「停薪留職」係黨內中委會決定，佢尊重黨內決定。至於會否擔心選舉工程開始時，不滿佢嘅黨友拒絕動員拉票，阿廷話惟有盡力解釋。
白鴿黨黨內不和，相信唔少保皇黨見到都偷笑食緊花生。白鴿黨副主席羅健熙就喺facebook回應，話阿廷喺北區開展地區工作時，佢部份總幹事工作已因此暫停，當阿廷參與黨內甄選出戰立法會時，更加係停薪留職。嘩，選舉仲未開戰，阿廷已喺黨內中箭，其他黨派嘅內訌，相信會陸續上演。
李八方
mailto:[email protected]