【業界支持】
的士業界每次向運輸署申請加價，不時因車主及司機團體意見分歧，最終拉倒收場，主因是以往的士獲准加價，車主隨即加車租，令司機收入無直接增加。但今次業界申請加價，獲各司機工會、協會等逾九成半業界支持。有的士司機透露，一旦運輸署批准加價，車主已向司機承諾3個月至半年後才會考慮加車租，前線司機收入可望直接增長約一成。
轉揸Uber 流失率達8%
支持今次加價的市區的士司機聯委會主席關沃華表示，「上次（2013年）申請加價我都有反對，但係今次唔同，唔擔心車主加租，因為市場多咗Uber爭生意」。
他解釋，近半年的士司機流失率達7至8%，不少司機轉駕駛Uber，加上現時九成的士司機年齡逾50歲，行內青黃不接，「車主加租，我哋（的士司機）都搵唔到食，就唔會再租車，有啲轉揸Uber，車行都驚冇人租車，如果再加車租仲邊有人肯做，又冇人入行」。
汽車交通運輸業總工會的士司機分會主任杜燊棠也稱，以往運輸署批准的士加價，「車主就加車租，司機收入一直冇多過」。但他指近年的士業鬧司機荒，流失率高達一成。他又稱，車主團體已承諾，一旦運輸署批准今次加價，3個月至半年後才會考慮加車租，前線司機收入可望直接有約一成增長，「有車主承諾咗，唔係好似以往咁，一申請的士加價，車主就加車租，希望今次申請加價後，司機收入可以增加一成」。
■記者譚靜雯