西貢鹽田梓鹽田復修項目獲聯合國教科文組織頒發2015年亞太地區文化遺產保護獎嘅傑出獎，除咗係中國第三個獲獎項目，更加係香港首個保育項目獲此殊榮，咁巴閉當然要慶祝吓，政務司司長林鄭月娥噚日冒雨入咗鹽田梓出席頒獎禮。
再獲聯合國文物保護獎
林鄭2013年3月親臨過呢條有300年歷史、具天主教特色嘅客家村，為鹽田復修動土禮做主禮嘉賓。林鄭噚日致辭時話對呢個項目獲獎非常高興，憶述自己卅幾年前做過西貢政務處嘅助理專員，一早已經當咗自己係西貢人。
其實鹽田梓村已經係第二次獲頒聯合國教科文組織亞太區文化遺產保護獎，村內嘅聖若瑟堂2005年獲聯合國教科文組織頒發優異項目獎。林鄭話一個咁細嘅島，可以兩度獲頒聯合國教科文組織嘅文物保育獎，可能係世界上絕無僅有。
佢同時幫發展局賣埋廣告，話該局第一期「活化歷史建築伙伴計劃」下嘅YHA美荷樓青年旅舍活化項目，亦獲頒呢個國際獎項嘅榮譽獎，話鹽田梓同美荷樓同年脫穎而出，證明雖然香港對文物保育工作相對稍遲開展，但成績有目共睹。