年年25歲的樂壇校長譚詠麟（阿倫），昨日驚傳昏迷入院消息！有讀者報料指前晚阿倫飲醉酒，返屋企嘔吐後昏迷，被送到灣仔律敦治醫院，昨早仍留院觀察！
暢飲滿面通紅
原來前晚阿倫出席「打工皇帝」霍建寧為太太舉行的生日派對，同場還有李克勤、容祖兒和男友劉浩龍，克勤在Instagram貼出跟阿倫的飲酒相，留言：「今晚的威士忌，冇得頂！」枱上放有多支不同種類的酒，兩人似乎好盡興，相片中的阿倫飲到滿面紅光，不過神情仍很清醒。
昨日阿倫接受本報電話訪問，原來只是有人大整蠱，他親自報平安說：「黐線！儍㗎，我𠵱家去緊馬場。」問到被人惡作劇會否很嬲？阿倫很大方笑騎騎說：「唔嬲，冇嘢。」
揀帳篷有經驗
之後阿倫主動提起黎明4D演唱會，他說：「我想講吓黎生件事，我真係感同身受，因為我當年都係咁。」阿倫94年在香港大球場開騷，當時因受噪音限制，被迫調低聲音，更自嘲是細細聲演唱會，阿倫說：「知道好難過，明白佢苦況，當年自己三星期冇瞓覺，晚晚瞓唔到，都唔知開唔開到騷，又賣晒飛，仲有好多海外觀眾飛嚟睇，最慘係呢個情況！」
阿倫祝福黎明個唱成功：「我都想喺嗰度申請開4D演唱會呀。」問是否不用中國製帳篷？他說：「我唔發表任何意見，自己做演唱會40年，有經驗。」
採訪：皓騫