時下小朋友要學嘅，點止跳舞彈琴咁簡單？資訊科技發達嘅年代，學習編寫電腦程式，先係大勢所趨，城市大學電子工程學系副教授張澤松就逢周六、日開班，每堂一粒鐘，免費教市民寫Scratch、App Inventor、JavaScript同Python等程式，而且歡迎家長同仔女一齊參加，原來係想藉此減少兩代人喺科技應用方面嘅隔膜。
張澤松喺一年幾前推動呢項名為「一小時編程香港」嘅活動，佢接受政府新聞網訪問時話，希望增加市民對電子工程嘅認識，除咗想父母同仔女有親子樂，仲可以享受程式碼嘅樂趣。 陪住小六囝囝駿彥上堂嘅梁先生都話，兩父子一齊學，真係可以建立共同話題，唔怕大家冇溝通；駿彥則話相信第時喺學校學寫程式時，更加易上手。