法國五月藝術節前晚喺文化博物館舉行莫內名畫展暨慈善晚宴，城中名人明星親臨撐場，其中劉嘉玲穿透視裝襯黑色bra加外套到場，型格中帶少少性感。講到莫內嘅畫，佢話：「收藏唔起，因為真係好貴，只係可以去博物館參觀。」
講到收藏，嘉玲入行都33年，有啲晚裝好靚，都唔捨得拎出嚟，但戲服就唔多，因為拍完戲都畀番電影公司，佢話：「我都只係打劫到兩套，就係《2046》同《阿飛正傳》，因為同張叔平好熟，所以打劫到。」講到老公梁朝偉接咗《歐洲攻略》，嘉玲話：「𠵱家偉仔仲喺上海拍緊《擺渡人》，拍完就會去歐洲，其實本身佢想休息幾個月，但《擺渡人》要趕埋尾。」
詩詩讚妹認仔叻
同場嘅汪詩詩就同媽咪一齊嚟睇畫，之前詩詩生日時，佢收到囡囡親手畫嘅電話套，囝囝就送咗一堆親手做嘅優惠券，好似話會幫手洗碗嗰啲，好鬼窩心。講到妹妹圓圓孖B嘅百日宴，詩詩就話好有氣氛，問到詩詩媽咪分唔分到兩個孫，佢就話都有試過認唔出，但最叻都係圓圓，認得出兩個BB。
撰文：馮仁昭