【拆局】
警務處處長盧偉聰昨稱，警方暫未找法律顧問研究港獨觸犯那些刑事條例，有政界人士形容等同「將個波（港獨）踢返去畀律政司」，不少法律界中人早已提出，單是談論港獨不足以構成刑事犯法行為，律政司司長袁國強因政治壓力而提出研究，「到時建制日日追問政府幾時告，港獨人士又知你未必告得入，繼續講港獨，成件事收唔到科」。
變相為港府留退路
該政界人士稱，原本北京及特區政府一直立場是港獨言論違反《基本法》，「根本係政治問題，應該用政治解決」，但北京及本港一些強硬派提出港獨言論違反《刑事罪行條例》，「目的係要逼政府做嘢，客觀效果係要刺激港獨矛盾升溫」。
有法律界人士稱，特首梁振英上周開行會前談港獨，提及「除了法律之外，還有政治和經濟後果要考慮」、「不能夠說那件事、那種言論合法，我們就可以罔顧社會的利益」，其實變相為港府留退路，「承認未必可以用法例告（港獨），但咁唔代表港獨冇嚴重後果」。
該法律界人士更稱，袁國強現在承諾研究本地法例處理港獨言論，「最終係咪告都會有政治反彈，警方一定唔會孭，梗係交番個波畀律政司，等律政司搵到（港獨）犯乜法，差人咪先做嘢」。
■記者莫劍弦