越夜越癲，越夜越喪，一個完全挑戰電視尺度及衝擊觀眾官能刺激的ViuTV深宵節目《晚吹—真PK》，開播以來爭議性十足，舔腋下、露股、夾乳頭，惡心程度百分百。將觀眾的快樂建築於自己痛苦之上的主持Kevin Boy（KB）和火火，坦言做《真PK》只求自high。對於有觀眾批評太cheap，火火說：「唔開心咪轉台囉！」而打鼓打足十多年的KB對自己露股出位則笑言：「原來我打鼓都唔及露股！」
撰文：魯吉
樂隊LMF及Hardpack鼓手李健宏（Kevin Boy），與身兼導演、電台主持及填詞人的李家榮（火火），近日為ViuTV主持深宵節目《晚吹—真PK》，他們要在鏡頭前舔腋下、露股、夾乳頭，甚至兩個大男人嘴對嘴，出位舉動徹底打破傳統電視框框。
儘管觀眾睇得過癮，但也惹來不少批評，認為節目太低俗無聊。對於觀眾投訴，火火日前與KB接受本報專訪時表示早有心理準備：「投訴梗有，我哋都係為咗大家開心，絕對唔介意！睇得開心，我哋無任歡迎，你唔開心咪轉台囉！開心啲逃離社會，係我哋最想做。」
望引觀眾睇電視
KB曾在網上整蠱節目《情義兩難全之玩爆你個腎》中當街裸跑，故《真PK》對他而言屬小兒科，KB說：「我哋又唔係做犯法嘢，可能係將細個玩嘅嘢搬番出嚟電視機，好『輕kan』，我哋又冇塞啲嘢入避孕套度吞落肚，再屙番出嚟畀嚿屎佢食！」
無綫周六《晚間新聞》因為《真PK》硬撼致收視連番插水，對此KB淡然說：「我接呢個節目都係為咗自己high，希望帶啲歡樂畀大家，從來冇諗過競唔競爭。」相反火火卻表現興奮：「梗係想多啲人睇，我希望良性競爭，如果佢跌（收視）係因為我哋高咗嘅話，佢咪可能會做啲更加好睇嘅節目囉？最好係我哋升5點，佢哋又升5點，多咗人睇電視就最好！」
KB甚少留在家中看電視，只喜歡上網睇YouTube，相反火火慣與家人「電視撈飯」，講到無綫節目質素，火火坦言沒有選擇：「免費電視有樣好，你除咗用個remote轉台，你唔會食食吓飯開着個機頂盒，開第二啲台？都係求其播住食飯啦！」他更認為過去15年電視跟魚缸沒多大分別：「魚缸啱啱買返嚟，你會覺得幾靚，睇兩年會開始覺得冇新意。電視都係，細個覺得好多劇睇，睇到慣咗，但佢仍然冇新嘢，就變咗個魚缸，由得佢開住，好似《魚樂無窮》囉！」
「打鼓唔及露股」
首次做電視主持，火火坦言感覺是「意想不到」：「我做演員、電台、電影、填詞，都冇諗過做咗兩集就可以上C1，原來入屋就得電視，仲有咁多人談論。」KB則認為是bonus：「初初質疑會唔會有人睇？一出街個個friend打嚟話笑到仆街，我咁大個仔，畀心機打咗好多年鼓、夾咁多隊band都上唔到C1，原來我打鼓都唔及露股！」
眼中的PK王者
火火與KB自認是PK，未知二人心目中誰最PK？KB笑說：「最衰嗰個其實全香港人都知！」火火則謂：「人人都要自己攞行李過關，係佢唔使！捫心自問，可能佢都唔想，做呢個位日日俾人鬧，又或者佢做出嚟嘅嘢其實係咪佢話事？有好多仆街嘢用佢把口或者佢簽個名通過，佢其實簽完之後會唔會話『對唔住呀，香港人』？我唔敢講佢唔係，但冇人知吖嘛。」
小遊戲：拒答問題行夾刑
今次專訪記者跟Kevin Boy和火火玩了一個小遊戲，向他們問4條問題，若其中一方不想作答的話，便由另一個用夾仔夾面部任何一個部位，結果……
（1）ViuTV有乜嘢唔好地方？
火火：時間表好亂，有晚想捧自己場，話11點半，等咗幾個字以為cut咗冇得睇，原來11點45分先做，第二個禮拜我12點返到屋企，諗住仲有15分鐘睇，原來又11點半做番，好多人講ViuTV最唔好係節目表好亂、好難跟！
KB未能作答而被夾
（2）林建岳講過：「如果話雲吞麵係全港最好嘅餐廳」，你會唔會服氣？」點睇呢句說話？
火火與KB拒絕作答而互夾
（3）有人覺得689好PK，點睇？
火火：係嘅！令到咁多人唔開心！即係做我哋阿頭，下面啲員工做得唔開心，賺到錢都冇意思！
KB：佢係最PK，令到我哋成個香港都唔開心，香港本來幾好㗎嘛！
（4）你哋都係太陽娛樂旗下藝人，點睇老闆周焯華同Mandy Lieu嘅婚外情？
KB與火火二話不說自夾，KB揚言要夾夠6個夾仔，火火仲話：「呢條問題問嚟都多餘！梗係唔答啦！完全冇單咁嘅事！完全冇聽過！」
