周日(1日)第四場三班2000米，「天長地久」上仗由雷神莫雷拉贏泥地賽，今仗升班跑田草2000米，隻馬過去亦贏過此程，今次如果超兩磅負115磅，輕磅嘅雷神亦可以再騎，但結果佢揀咗「將才」，明顯後駒機會更勝一籌。
睇番「將才」係去年2200米二級賽意大利打吡殿軍，擺明係中長途馬，來港後第二次上陣，喺絕對嫌短嘅1000米直路賽，亦可以狂追輸唔遠，已知潛質非凡。
到咗上仗「將才」配蔡明紹角逐田草1800米，蔡明紹唔多醒目，隻馬出閘笨拙，儘管紹仔隨之力策，「將才」仍被馬群拋離，遙遙墮後脫晒節，睇開跑馬嘅朋友，都知道咁嘅情況，最終九成九會落第，點知「將才」彎位一段開始好似癲咗咁狂追，結果最後兩段締速都最快，追入一席季軍，認真誇張，亦可見此駒夠晒韌，今次增程跑2000米一定更好。
今次紹仔冇得再騎「將才」，只能怪自己上次早段騎唔起隻馬，改配莫雷拉執韁，仲要抽1檔，雷神又點會同你客氣？紹仔都係認命把啦！