巴西上周五公佈美洲盃40人大軍名單，巴西同巴塞似乎傾掂數，冇徵召尼馬，但相信巴塞會放佢去踢奧運。森巴大軍名單都好似有啲大牌冇份，好似巴黎聖日耳門（PSG）中堅孖寶堤亞高施華同大衛雷斯都榜上無名，反而師弟馬昆奴斯哥利亞就入圍。講開PSG，佢哋法甲已晨早封王，不過上周五仍然主場4:0大勝雷恩，累積89分已經平法甲得分紀錄，贏晒餘下三仗更可去到98分㖭！