朋友A有潔癖，去親旅行好麻煩，驗屍式檢查酒店房每個角落，就算睇完冇嘢，都要提心吊膽瞓唔着。何苦呢？其實唔使用劍嘅，用黑光燈就得啦！
睇過美劇《CSI》，可能記得探員會用一種能夠射出紫外線的燈，做犯罪現場鑑證。名堂其實叫黑光燈，即使抹過的血液、精液都無所遁形。這些電筒，淘寶都有得賣，但就要幾千元一支，質素存疑。況且又唔係捉姦，無啦啦使一大筆，好嘥箒。
網上就有不少影片，教人用手機自製黑光燈。做法簡單，只需預備膠紙、紫色同藍色箱頭筆，在手機閃光燈位置，貼三層膠紙。第一、二層塗藍色，第三層塗紫色，然後開啟閃光燈拍照。
經我們實試發覺，畫面是變紫了，但手機根本不能放射紫外線，拍不到任螢光物，一句講晒，流嘅。
於是我們到鴨寮街，買到了支約$200左右的黑光燈光管。雖非鑑證級數，未必能照到血液、精液，但體液、塵埃及對身體有害的螢光劑，一樣清楚可見。於家中測試，黑光燈一開着，無論是被鋪上的口水迹、洗手間的尿液、尿迹，或是衣物上的汗迹，都馬上現形。
但屋企還可清潔番補救，外遊時要酒店就防不勝防，台灣《蘋果日報》就曾經拍攝過汽車旅館內的恐怖情況。旅遊籽就去了北角一間國際連鎖品牌三星酒店，測試房價約$650的房間的整潔程度。房內的床單、枕頭、被鋪都相當乾淨，毛巾、電話、亦照不出污迹。只是冷氣掣位較多塵、地板有疑似油漆痕，以及木衣櫃旁有補過油的紅色，但整體來說相當不錯。
唯一是浴室的地下及洗手盆較多污迹，可以見到有一攤白色的迹，又看到一個螢光紅色的印 。不過又不用過份緊張，其實牙膏、 番𤩹迹都會在照射下發光，雖然都是污迹，但起碼沒有體液那麼嘔心。如果真的受不了，可以向酒店提出換房。
問題是，拿着這麼大支光管，怎帶去旅行？其實可用黑光手提電筒代替（6W約$198，鴨寮街有售），更同時可用來照偽鈔， 以及檢驗化妝品有否含螢光劑。但要留意，黑光燈跟市面上很多用來殺菌、Gel甲的紫外光燈看上去相似。但紫外光燈會傷眼，黑光燈就不會，最好問清楚以免買錯。
記者：甄俊宇
攝影：鄧鴻欣、徐振國