正所謂一次意外足以致命，「紅軍」利物浦周四歐霸盃首回合作客維拉利爾，全場表現都唔錯，但補時階段後衞艾拔圖摩蘭奴發夢下，「黃色潛艇」前鋒阿祖安盧比斯一箭定江山，以1:0勝出；不過紅軍領隊高路普都好有信心次回合返到晏菲路可以反先。
補時失守負0:1
維拉利爾嘅會歌同紅軍一樣係「披頭四」名曲，不過唔係〈You'll Never Walk Alone〉，而係〈Yellow Submarine〉，兩軍都鍾意披頭四，唔多唔少都有淵源，賽前主隊球迷仲拉起橫額，悼念希斯堡慘劇。
不過落到球場雙方都打真軍，今仗收起近期大勇嘅前鋒史杜列治嘅利物浦形勢較被動，維軍前鋒巴卡保46分鐘頭槌攻門中柱，利物浦滿以為守和之際，補時兩分鐘終於失守，維軍一次反擊，由丹尼斯蘇亞雷斯傳中，阿祖安盧比斯近門射入，1:0擊敗利物浦，前仗對紐卡素交出兩個助攻嘅艾拔圖摩蘭奴，回防唔夠快失晒位，搞到球隊臨尾香，真係要負好大責任。
不過咁，首回合輸一球，次回合返晏菲路大把機會追，紅軍領隊高路普就話：「同首回合交手前比較，我嘅信心冇減少到，有主場球迷支持下，可以完成好多不可能任務。」英國《每日郵報》就影咗高路普辦公室做詳細分析，除咗有好多關於哲學嘅書，高路普都幾為食，有朱古力、果汁同啤酒，佢櫃上就擺咗當年幫多蒙特贏德甲嘅紀念獎牌，唔知今季又會唔會多個歐霸盃獎牌呢？
西維爾擁兩作客入球
同日另一場準決賽，西維爾憑加美路尾段入球，2:2逼和薩克達，有兩個作客入球在手，出線機會都好高，但丹麥前鋒高恩迪利膝傷重創提早收「咧」，就算入決賽都唔使預佢嘞。