上司炒下屬魷魚，在商業社會，司空見慣，香港之勞工法例，並不是法國式（炒人幾艱難，賠償費用甚高），而是按照美國習慣，一聲炒魷，夥計便得乖乖執嘢清理枱面，由保安員「護送」出公司大門口，2008年金融海嘯時，曼赫頓雷曼兄弟門口，大把呢類鏡頭出現。香港大金融機構內之「炒房」，無論交易員職位有多高，一收到大信封，就要立即起身，與同事講拜拜都嚟唔切。
報館炒人又點？左丁山做過管理高層，當然略知一二，咪又係上司有令，不得不從！從未聽過、見過有職員協會、工會出頭，為被炒員工抗議，嘈交嘅。一位師弟在報館服務多年，升至高位，某日返工突然間入唔到閘，心知不妙，頃刻保安人員已將佢嘅私人物件打包送咗出嚟，叫佢攞番，人工補薪自然不缺，咁就算數，返到屋企，下屬記者仲打電話嚟問：「Ａ哥，仲未見你返嚟睇稿嘅？」
所以咯喎，明報總編輯鍾天祥炒執行總編輯姜國元，理由係工資高，公司要節流，居然搞出風波，就真係新聞界嘅新聞，明報職工抗議，要求管理層解釋，下面編輯容許副刊作者開天窗抗議，令總編輯夜晚下令停印報紙，着着顯示鍾天祥已經無法控制編輯部，係一個寡頭司令，編採人員根本唔聽佢枝笛，實行「編採自主，自把自為」。在其他所有媒體，根本係不可能發生呢類全無紀律之事。
明報大股東張曉卿本身係木材商人，在南洋開發木山發達致富，因緣際會，買埋星洲日報，成為彼邦報業老闆，1995年，于品海之控股公司「智才」因搞中天電視台導致財困，被逼出售「明報」，由獲多利做介紹人，匯豐做貸款（梁高主理），與張曉卿接洽成功，於是張曉卿入主明報，又因佢自己冇班底，留用全部編輯人員，放手俾原有編輯部管理報章新聞取捨，現在嘅營運總裁甘煥騰係當時廣告部主管。因是之故，明報編輯部之獨立性，為全港媒體之冠，其他報章之大老闆日日督導甚嚴，根本係由老闆主導，營運方式與明報大大不同。
久而久之，明報編輯部有其自主傳統，「積習難返」，而今張老闆先至要透過馬來亞人鍾天祥取回編輯部主導話事權，唔係唔得，老闆始終係惡啲嘅，但係要硬闖囉，張老闆夠唔夠膽炒三四十人嚟重組編輯部，以示I'm the Boss呢？走着瞧。