【立會掟杯案】
【本報訊】連續3日就掟杯案出庭指證立法會議員黃毓民的民建聯議員黃定光完成作供。曾批評黃毓民盤問吹毛求疵及喜捉字蝨的他，昨一度向官「求救」，問「有冇權保持緘默呢？」黃毓民反斥他咬文嚼字浪費時間，兩人再掀罵戰，黃毓民一度指黃定光蠢。而接着出庭的立法會保安則稱，警方未獲行管會主席或立法會秘書長批准便擅入立法會蒐證，做法不妥當。
黃毓民昨指潑水一刻已有數名保安將他制服，令他失重心；黃定光不認同指「我覺得係箍住你」，又解釋「我理解制服係不能動彈，你兩隻手仲可以郁……」黃毓民聞言怒指：「你唔好喺度咬文嚼字，嘥我時間！發爛渣！發脾氣！」黃定光反駁：「我冇發脾氣，係你發爛渣！」黃毓民遂向裁判官投訴：「佢講第二啲嘢你要制止佢。」官着他吩咐證人回答是或非，但黃毓民強調：「法官大老爺，我講冇用嘛，要你講嘛！」黃定光隨即問官可否拒答問題。
警進立會蒐證未獲批准
黃定光看片時一度指向畫面，「直情係掟（杯）落證人一號（梁振英）頭上」，得意洋洋反問：「啱唔啱呀？啱唔啱呀？」官即打斷：「你唔係問問題，係答問題。」黃毓民冷笑，遭黃定光斥：「你掟人仲咁開心！」黃毓民向影片指，玻璃杯碎片綻開一刻，陳偉業議員第二度掟紙星星，指梁頭頂的所謂玻璃碎只是紙星星，黃定光不同意：「頭先唔係呢度，你問得唔清楚……」黃毓民不耐煩指「再播喇再播喇」，並低聲道「頭先其實係想提醒你，不過你又蠢……」官聞言制止：「你唔能夠咁樣侮辱證人。」
控方接着傳召曾任警員的立法會高級保安助理關耀基，他承認事後才知警方未獲行管會主席或立法會秘書長同意擅進立會蒐證。黃毓民稱曾收匿名信，指關的上司總保安主任周偉德吩咐下屬阻住他的座駕離開，其後行管會裁定周行為失當需道歉，關指知悉這事。案件下月10日續審。
案件編號：ESCC2615/15
■記者楊思雅