灣仔不嬲都係動漫迷嘅聚腳地，金紫荊廣場附近嘅「香港動漫海濱樂園」噚日開幕，入面有30個真人比例本地原創動漫角色雕塑，包括老夫子、步驚雲、聾貓同顛噹等；當中加入富香港特色嘅場景，好似幾乎失傳嘅街邊理髮檔「飛髮」、大型蒸點心籠、電車、跳飛機等。如果嫌齋影相悶，仲可以同聾貓、燎原火打番場麻雀！大會就話樂園為期3年，公眾免費入場，料每年吸引300萬名遊客。商經局局長蘇錦樑同旅發局主席林建岳噚日都有嚟開幕禮，之不過影完相就急急腳咁走，傳媒叫住都一於少理，唔通趕住去睇黎明？
