喺香港想獲得特事特辦嘅禮遇，除咗你要姓梁外，姓張都得。話說原定下月18至19號，首次嚟香港喺會展舉辦嘅IT界大會Cloud Expo Asia（香港亞太雲端科技博覽），由於全國人大委員長張德江訪港，結果要成個大會搬去大嶼山亞洲博覽館。
一直幫手跟進嘅公專聯莫乃光（Charles）同八方講，主辦單位兩星期前向佢求助。由於主辦單位要17號入會展準備，而會展為咗為張大人訪港作準備，所以唔畀得主辦單位入場，結果展覽咪要讓路囉。
Charles仲話，佢覺得唔可以怪會展同貿發局，事關佢哋都唔知張大人會嚟，不過覺得呢個展覽曾於倫敦、新加坡搞過，屬業界大盛會，加上近年香港喺舉辦呢類大展覽經已輸畀新加坡，今次第一次嚟香港搞就發生啲咁嘅事，真係唔係幾好，希望下次再遇到咁嘅情況，當局可以安排得好啲。