下周日絕對係李斯特城嘅大日子，因為只要佢哋作客擊敗曼聯嘅話，就即刻喺英超封王，而據《泰晤士報》報道，若李城奪標，領隊雲尼亞里仲有670萬鎊（約4,255萬港元）獎金㖭！李城球迷日前就拍片多謝雲尼亞里，仲睇到呢名64歲嘅領隊眼濕濕㖭！至於李城嘅對手曼聯，又傳出已經傾掂數，搵摩連奴代替雲高爾掌帥。而紅魔中場桑馬達，喺周四同一班隊友慶祝自己嘅28歲生日，唔知係咪想賽前沖喜呢？