隔咗10年再次殺入世界桌球錦標賽四強嘅香港一哥傅家俊（Marco），周四喺英國舉行嘅四強戰，面對世界排名第一嘅英格蘭球手沙比；喺33局17勝嘅賽制下，Marco打完首節之後，暫時以3:5落後。（now637台今日5:00pm直播傅家俊對沙比）
Marco喺八強有驚無險咁以13:11擊敗英格蘭球手賀健士，周四喺四強首節對住2014年世錦賽冠軍沙比，就打得比較慢熱，開賽後俾沙比連贏三局而落後；好彩，世界排名第14位嘅Marco喺小休前追番1:3。去到第五局，雙方都爭持得好激烈，直至打剩顏色波都未分到勝負；之後，Marco打出一次超靚嘅四cushion救黃波，加上沙比打藍波失誤，Marco得以追近到2:3。兩人之後各贏一局，其中Marco喺第七局仲打出暫時喺呢次對賽最高嘅一桿89度；沙比喺最後一局都打出一桿69度，為首節比賽「埋齋」。
小丁手緊優勢頓減
至於另一場四強比賽，就由狀態大勇嘅中國球手丁俊暉對蘇格蘭嘅麥馬拿斯。雖然之前小丁嘅表現實在差強人意，喺今次世錦賽要打外圍賽先可以晉身正賽圈，但佢先後擊敗咗高特同鄧立普之後，成個人立即唔同晒，周四首節仲拋離麥馬拿斯6:2。
不過，小丁喺周五嘅第二節就有少少手緊，領先9:3大好形勢嗰陣，俾麥馬拿斯連取四局，最後只係領先9:7進入今日繼續打嘅第三節。（now637台今日9:30pm直播麥馬拿斯對丁俊暉）