去年，玫瑰金iPhone 6s令不少天生粉紅控的女生趨之若鶩，Apple似乎食髓知味，今年3月尾發佈的9.7吋iPad Pro亦加入了玫瑰金機身，來到上周，再以升級版玫瑰金MacBook突襲一眾女生芳心，今天就邀請了兩位女生：音樂人楊彤及人氣YouTuber Ashly來品評新機功能、指點搭配方案。
音樂人楊彤：GarageBand作曲都夠順
「嘩！好靚呀！其實iPhone 6s已經想買玫瑰金，但當時冇貨，今次呢部玫瑰金MacBook一樣咁靚！」3月曾為美國樂隊Death Cab for Cutie香港站演唱會擔任表演嘉賓的音樂人楊彤（Ruby），毫不掩飾自己對粉紅色的愛慕，簡單以新機來上網、收發電郵及處理文件後，亦相當滿意。常於網上發表歌曲的她又說：「我用開MacBook Pro嚟作曲，今次試吓喺新機玩GarageBand，發現除咗開軟件嗰陣慢啲之外，入面嘅操作、處理多條聲軌同output等嘅流暢度差唔多，幾喜出望外！」另外，她尤其喜歡屏幕下方、向前發聲的喇叭，認為聲音效果比MacBook Pro更佳，足夠用來製作demo。「其實我成日會帶電腦出街，MacBook比MacBook Pro輕同細部得多，更加方便我隨身帶住佢嚟工作。」至於MacBook為人詬病、只得一個USB-C插槽的問題，Ruby反而覺得問題不太，「多帶一個轉換器，換嚟超輕便嘅機身，都算抵呀！不過如果有多一個普通USB插口當然更好啦，哈哈！」
YouTuber Ashly：上網OK，剪片no way
雖然音樂人讚不絕口，但要求更高的影片製作，新機能否順利過關呢？擁15.6萬訂閱者的YouTuber Ashly，平日會以相機及iMac來拍片、剪片，看她日常打扮少女，以為必定喜歡玫瑰金？原來卻不，「本身唔太鍾意粉紅色，加上我覺得用Apple就應該用最classic嘅銀色，感覺都比較專業。」外觀不合心水，功能又怎樣呢？Ashly先以新機上網觀看YouTube短片，因為機身的骰、Retina屏幕畫質優異，感覺也算不錯，但嘗試剪片時便出事了，「平日用iMac嚟處理影片都好快，今次用MacBook就好慢，我拍嘅是1080p影片，無論匯入抑或處理都多好多時間，應該唔能夠用喺我嘅日常工作。」公道一點，MacBook主打輕巧，以Core M處理器來剪片絕對是越級挑戰，Ashly說：「其實我好少會出去外面剪片，所以手提電腦都係簡單上吓網多，呢部MacBook都OK嘅。」
新舊對比：速度相若 耗電較少
除了全新玫瑰金機身，MacBook的蘋果標誌亦用上反光的玫瑰金色，整體做工依舊細緻，非常搶眼。硬件方面則有小升級，處理器由Intel Core M升級至第六代Core m3、m5或m7；8GB RAM亦由1600MHz換成更快的1866Mhz；顯示卡就由Intel HD Graphics 5300換成聲稱圖像處理快25%的Intel HD Graphics 515；電量則由上網9小時播片10小時，提升至上網10小時播片11小時。
記者試以新舊機同時開啟不同apps，例如iMovie、GarageBand、Safari及播放4K影片等，發現速度差距不大，但耗電量明顯少了一點。總括而言，若果已有舊版MacBook，新機當然不太吸引；至於未入手的，則能以相同價錢買來略有升級的新機。
記者：韓繼聰
攝影：徐振國、陳永威、楊錦文、林栢鈞
編輯：陳國棟
美術：吳子豪