本港樓價指數已由高位回落13%，跌勢已成。樓市唔同股市，股票跌咗一兩成，好多人想博反彈，但樓價之慣性（inertia）特別強，無論升浪定跌浪，通常維持較長時間，尤其是樓市辣招令炒家絕迹，博反彈最少要坐3年。再咁跌法，政府幾時至肯減辣？
「3D」辣招之中，BSD同DSD針對海外買家或非首次置業者，唔會咁輕易撤招，但SSD影響所有買家，包括買樓自住的上車客，應該會率先減辣。對樓市的影響，視乎點減。如果只係新買家免徵SSD，咁需求確會或多或少增加，而供應不變。但如果連坐緊SSD監的業主都即時解禁，二手供應蜂擁而出，等於對樓價落井下石。
小生估政府減辣卻正正係全面取消SSD。點解？唔通梁班子唔知咁會對樓市踩多兩腳？就係知至咁做！1997年老董推「八萬五」，泡沫時大增供應，被指獻計的梁振英又點會無諗過後果？八萬五被插足咁多年，小生卻認為係梁特嘅「功績」，如非樓價暴瀉七成，邊有藉口推CEPA、自由行振興本港經濟？邊會有「沒有我們來消費，你們香港早完蛋了」？中共於本港殖民又點會咁順利？
梁特再次推冧樓市，又有藉口推「中港融合」政策，紅色資本則趁低掃貨、買起香港，如此「功績」，做滿兩屆特首後，起碼官至政協副主席。你可能問：689未連任，點會推冧樓市、搞跨經濟咁笨？大佬呀，你同我都冇份選特首，民意於佢真係如浮雲。
笑笑生
mailto:[email protected]
本欄逢周五刊出