【中環站→九龍站】賭王何鴻燊四房孻仔何猷君，去年底同新加坡富商林榮福千金林慧俐（Kimmy）相戀，幾個月嚟兩人一直甜蜜蜜，但Kimmy早前為咗保護家人同工作，將部份相片刪走，猷君之後都有否認「分」訊。
事實上，呢對小情人不但冇分手，而且愛得癡纏，星期日Kimmy仲秘密嚟香港會猷君，同時又搵咗兩位女友人一齊轉移視線，事關佢簽約嘅韓國藝人公司要佢將感情事低調處理。不過，Kimmy前日終於撇甩同行電燈膽，孖猷君去中環置地廣場拍拖shopping。
邊玩邊買飛
當日下晝4點幾，一身運動裝、戴住cap帽嘅猷君同Kimmy，去咗時裝店Carven血拼，當然主力掃貨嘅係Kimmy，猷君就做廿四孝男友陪喺側邊，負責幫女友拎戰利品，一隻手拎兩個紙袋，另一隻手就拎住電腦同凍飲，顯得有啲手忙腳亂。
不過，相信猷君為咗同女友全程二人行，當日冇叫司機接送，反而做平民同女友坐港鐵，由於兩人都冇八達通，去到港鐵站要買車飛。甚少坐公共交通工具嘅佢哋，對購票過程仲好似感到好新鮮，一邊買一邊笑，又不時頭貼頭咬耳仔，猷君仲搭住Kimmy手臂笑笑口，但當時正值放工時間，車廂擠滿人，佢哋上到車都明顯較避忌，好多時都會耷低頭，最後兩人喺九龍站落車，轉場去圓方繼續行街。
採訪、攝影：畢紹基、潘冠恩、吳耀輝