恒隆地產（101）主席陳啟宗出晒名係忠實「梁粉」，懶理梁特呢幾年管治下，搞到香港越嚟越分裂，早排仲繼續撐到行。對於近期鬧得熱烘烘嘅「行李門」事件，陳啟宗竟然一反常態，封口唔講，究竟係佢費事越幫越忙，還是終於發現幫唔落呢？
話說恒隆噚日舉行股東會，陳啟宗一聽到記者話「你搭飛機拎行李會唔會……」，未問完，佢已經笑笑口、急急腳咁轉身走。記者追住佢再問，陳啟宗行快兩步兼收埋笑容，好嚴肅咁話「呢個問題我唔會答」。
行李門就封嘴，但講起內地樓市，陳啟宗就講到爆粗。陳啟宗指，內地一線城市樓市仲係好熾熱，講到三、四線城市呢，佢就突然大庭廣眾爆一句「死到仆街」。平日都好少聽到佢講得咁粗俗，咁樣講唔通真係好大鑊？