奧運四年先一次,唔係人人都去到,有機會參與實在值得紀念。新任亞洲冠軍、18歲男子花劍里約奧運代表張家朗,趁上個禮拜放假,實現咗應承過自己嘅一件事,就係去紋「奧運五環」上身(下圖)。
家朗噚日出席一個奧運100日倒數記者會,話紋身意念係嚟自NBA偶像洛文,但自己唔會周身紋,主要係難得第一次入奧運,一定要紋五環紀念;佢又話紋喺右臂後方,唔會咁揚喎。家朗今日就會重投練習,希望里奧能夠有好發揮。