有時米芝蓮餐廳嘅精緻國際佳餚，都未必夠一粒金黃色香噴噴嘅雞蛋仔、或者一杯濃郁芳香嘅熱奶茶咁吸引。查實𠵱家港人享受地道小食，未必只為醫肚，同時都係享受緊那些年嘅美好歲月。
時代廣場舉辦嘅「香港飲食文化」展覽好啱港人口胃，佢哋邀請咗香港收藏家協會副主席張順光，借出60至80年代香港飲食文化嘅收藏品，諸如舊餐廳嘅火柴盒、月餅傳單、月餅會封套、茶樓菜單等，都會一一展出。
展覽期間仲會請嚟傳統民間小食工藝師傅開設「街頭小食檔」，於不同日子即席製作雞蛋仔、龍鬚糖、糯米糍、麥芽糖餅、白糖糕、芝麻卷……等大家重拾啖啖滋味。展覽今日起至6月5日朝十晚十喺露天廣場舉行，街頭小食檔則喺本周六至6月5日開檔。