SAMSUNG Galaxy S7 edge是近期最熱門手機，不過行貨機身一直只有黑、銀及金三色選擇，大家都開始悶到淡出鳥來。
水貨版剛剛又有新色抵港，就是近年韓版SAMSUNG最愛用的特別色－－Pink Gold！其實這款顏色與iPhone最愛的玫瑰金有點分別，顏色會稍稍偏粉紅多一點，但底色又帶點金色及附帶一種電鍍金屬感覺，感覺女性偏向多一點。
玩Pink Gold 其實早有前科，話說韓版水貨Note 5，都曾經出過Pink Gold這隻顏色；相對港版的粉紅色，好多用家都發現有明顯差異，因為港版的粉紅色，會稍微偏向啞色及純粉紅感覺，欠缺了點點金屬光澤的質感。今次S7 edge是否有相同情況？由於行貨暫時仍未有新顏色的公佈，所以亦無從得知。
由於水貨是剛抵港，機價會稍稍偏貴一點，32GB版 Pink Gold賣街價為$5,580，相對同期的32GB版黑、銀及金色，則只需要$4,780；水貨舖負責人表示，高昂的機價大部分都是來貨價高的反映，如果想平入手，可能都要稍等一段時間了。
查詢：三禾電氣（旺角先達廣場1樓F33）
記者、攝影：朱崇德