中、港桌球一哥丁俊暉同傅家俊（Marco）喺英國設菲爾德舉行嘅世界桌球錦標賽齊齊發威；小丁先喺周二晚八強以13:3大勝威爾斯前世界冠軍威廉斯入四強，Marco亦叫緊糊，八強暫以大比數9:3領先賀健士。
今次世錦賽對29歲嘅小丁嚟講可謂百感交集，由於世界排名跌到落17位，要「淪落」到打世錦賽外圍賽；好彩佢冇氣餒仲一路過關，八強對威廉斯，第一節已經領先6:2，第二節繼續神勇，仲造出一cue 109，最後贏13:3，相當具說服力。「威廉斯打唔到佢嘅應有水平，我有好多攞分機會，亦都把握到。今次世錦賽，我抱住好放鬆嘅心情，賽前冇練好多波，可能呢個心態令我好得心應手。」小丁喺職業生涯攞過11個排名賽冠軍，但講到世錦賽，嚟到四強都只係第二次；佢對上一次喺2011年四強止步，睇吓今次鬥希堅斯對麥馬拿斯嘅勝方，有冇機會創歷史。
Marco亦走勢凌厲，昨晚截稿前以9:3遠遠領先賀健士，後者16強先以13:12篤走「火箭」奧蘇利雲，可能用盡全力仲未回氣；若Marco保持狀態晉級，下關就要火併八強以13:8淘汰韋遜嘅世界一哥沙比。（now637台今日8:00pm直播）