昔日女子組合Cookies「餅碎」楊愛瑾(Miki)雖然事業平平，但感情路上就覓得永安太子爺郭永淳，二人相戀約多年，上月31日被發現入紙排期結婚，Miki將於周六（30日）喺深水灣鄉村俱樂部搞結婚派對，邀請超過2百人。
好姊妹鄧麗欣(Stephy)早前同方力申十年情玩完，方力申講明唔想搶風頭，唔會去飲，而Miki今次擺酒就請咗自己緋聞男友鄭中基，據知Miki喺2005年曾傳捲入鄭中基同蔡卓妍（Sa）嘅緋聞，被踢爆鄭中基同Miki夜會蒲吧，更喺酒吧內拖手仔，事後Miki力撐鄭中基非屬無賴，但Miki今次擺酒就冇請舊愛徐天佑，據知情者講，其實Miki同天佑分手，佢哋都再見亦是朋友，冇反咗面，再講天佑上年先結咗婚，估計係唔想尷尬，先冇請對方，不過Miki準備咗回禮送畀對方。