由踢港會，再返英國踢業餘聯賽，之後又再返嚟香港踢晨曦、南華，跟住仲入選埋港隊，然後憑世盃外嘅表現，俾中超球會睇中，加盟長春亞泰。積施利呢個故事，吸引到祖家英國《太陽報》嘅注意，喺長春幫佢做咗個專訪（圖）。
的確，積施利嘅故仔係幾勵志。雖然仲有唔少人覺得佢唔夠班、跑得慢，叫佢肥Jack！但起步比人遲嘅佢，由喺英國搵20鎊周薪，到今時今日贏一場波有約10,000鎊獎金，付出嘅努力都唔可以輕視。不過想提提《太陽報》記者，南華同晨曦其實同港會一樣，係香港球會，唔係中國球會嚟㗎。
