舊嘢唔一定唔好，好似呢排小弟凌晨12點幾就坐定定重溫大台套《鹿鼎記》，韋小寶唔係黃曉明，亦唔係陳小春嗰套，而係梁朝偉做小寶、劉華做康熙嗰套，早幾日先做番小寶與眾女大鬧麗春院一幕，認真經典，嗱，大家都批評商天娥做阿珂有啲勉強，但仲有劉嘉玲、景黛音、周秀蘭，真係唔錯㗎。不過大台近期硬銷盒子，其中一個賣點係舊劇，仲要有埋已熄機嘅亞視劇;當年亞視日日回帶重播，香港人都唔睇，今時今日大台想人畀錢睇，似乎呢個如意算盤打唔響。
舊嘅唔去，新嘅又點嚟，卡斯拿斯(圖)雖然被封為「聖卡斯」，過去踢皇家馬德里都算鞠躬盡瘁，但始終唔可以長留馬德里，今季更加被踢到去葡超波圖。以為冇卡斯拿斯守龍，皇馬防守力一定差咗啦，事實就相反，皇馬35場聯賽只失32球，平均一場失0.91球，門將基羅拿華斯個人失球率更只有0.71球，新門神當之無愧；相反卡斯拿斯今季去波圖，堂堂昔日班霸𠵱家只排第三，遠遠落後一對死敵賓菲加同士砵亭，波圖主席都講過後悔簽咗佢番嚟。
六月歐國盃，西班牙雖屬衞冕身份，呼聲就及唔上世界盃冠軍德國同東道主法國，始終同教練迪保斯基用人保守有關，今時今日仲用34歲嘅卡斯拿斯做正選兼隊長，相反曼聯門將迪基亞呢兩季進步有目共睹，上周六場英足盃準決賽，如果唔係迪基亞又有神勇演出，曼聯早早出局啦，邊輪到安東尼馬迪爾絕殺晉級。所以唔怕得罪講句，卡斯拿斯真係阻住西班牙個地球轉。
文：牽牛