玩具大王蔡志明孻仔蔡加讚（Karson）同汪圓圓前晚幫佢哋一對孖仔，喺深灣遊艇會搞百日宴，大玩挪亞方舟主題，以藍色佈置為主，整咗好多一雙一對動物卡通紙板裝飾外，仲有將大女Celine同孖仔嘅相做成紙板公仔畀賓客影相，汪詩詩一對仔女仲上台唱歌助興。
之前，Karson同圓圓已經幫孖仔改咗英文名Christian同Kameron，而中文名就跟番家姐「婧」字音，不過就轉咗「靖」字，大孖叫蔡靖天、細孖叫蔡靖曦。
靠帽仔識別
由於大細孖係同卵雙生嘅孿生兄弟，樣就似爹哋多啲，但都搞到做老竇嘅Karson有時分唔到邊個係哥哥，邊個係細佬，好多時圓圓要幫佢哋着唔同嘅衫仔，好似前晚佢哋雖然都係着牛仔恤衫同一打扮，不過大孖Christian就戴咗白帽仔，細孖Kameron就戴黑帽仔做識別。
Karson笑言孖仔性格好唔同：「雖然佢哋好似樣，Christian就好有大哥風範有氣勢，細佬Kameron比較隨和，見親人就好鍾意笑。」佢哋兩夫婦兩年抱三已經好滿足，暫時唔會追BB，圓圓就話成家人都好錫孖仔：「家姐每日朝早都要搵佢哋錫一啖，爺爺嫲嫲一有時間就嚟探佢哋。」
撰文：馮仁昭
