【立會掟杯案】
【本報訊】立法會議員黃毓民涉掟杯襲擊特首梁振英案進入第六天，黃多番質疑出庭頂證他的民建聯功能組別議員黃定光為「討好梁而自動獻身隊我」，又大翻舊賬，呈上黃定光過往在立法會打瞌睡的「18睡相圖」，直指他「成日瞓覺」，未能敍述案發經過。黃定光雖稱睡覺屬人之常情，欲以曾患睡眠窒息症致睡眠質素差解畫，強調「低頭沉思、打吓喊露」是正常反應。
記者：楊思雅
黃毓民盤問開首便問有否聽過「民建聯最無恥」這句街知巷聞的口號、是他在2008年選舉論壇中發明，黃定光回應指「聽都冇聽過」；黃毓民又問及是否知悉「禮義廉（無恥）」T-shirt的緣由，黃定光均表示不清楚。
盤問期間，黃毓民多次列舉自己的「功績」，指出過往一直批評小圈子的功能組別選舉，質疑循進出口界別投身議會的黃定光「你哋成日食免費午餐、零票當選」，認為黃定光是出於不滿而出庭指證他。黃定光反駁：「我係全票當選。」他又否認有不滿，大家只是「唔同立場」。
黃毓民又將拉布與黃定光瞌睡之謎扯上關係，強調自己2012年起開始拉布，及後拉布常態化，舉例指梁國雄曾因擔心黃定光的安危而向主席舉報他睡覺，質問「係我令到你係會議廳瞓覺，令到你出醜，所以好憎我？」黃定光否認，解釋當時因抗議拉布而「作狀瞓覺」，並大聲強調「佢（梁）一叫我，就即刻彈起」。
黃毓民聞言大感詫異「即係你扮瞓？」觀眾席隨即傳出竊笑聲。
黃定光認開會睡覺人之常情
過往有報道指黃定光在開會期間剪指甲、看洋妞、看桌球片等，他直認不諱，黃毓民跟着突然向法庭呈遞本報拼合黃定光的「18睡相圖」，指對方「成日不敵睡魔咁瞓覺」，質問「到底你係不能自控定係身體有問題？」黃定光承認不能自控，又言睡覺、打瞌睡等屬「人之常情吖」。
黃定光又主動提及拉布會議沉悶，令他不能自控地打瞌睡，批評「有啲議員可以返去office休息，我哋就要被綁架喺座位」，以免流會。
盤問下黃定光承認曾患睡眠窒息症，透露現時仍佩戴呼吸機睡覺，黃毓民反問「咁你又冇帶去立法會嘅？」他竟反駁「立法會唔係瞓覺嘅地方！」當黃毓民向他指出睡眠窒息症的病徵包括「日間比較疲倦、集中力低、記憶衰退及性能力減低等」，黃定光均表同意。
黃毓民遂質疑以黃定光的記憶力及在會議睡覺的表現，根本未能敍述案發經過，黃定光否認，並將於今天繼續出庭接受盤問。
案件編號：ESCC2615/15
黃毓民與黃定光對答
黃毓民：我喺2008年向李慧琼指出「民建聯最無恥」，呢句口號街知巷聞，我發明嘅，冇聽過？
黃定光：聽都冇聽過，你𠵱家話我知。
黃毓民：我過去咁多年批評功能組別嘅議員小圈子選舉，話你哋成日食免費午餐、零票當選，係咪對我好不滿？
黃定光：我係全票當選。
黃毓民：我2012年開始拉布，搞到立法會之後成日拉布，令你喺立法會期間瞓覺、令到你出醜，所以好憎我？
黃定光：我瞓覺係因為抗議梁國雄議員拉布，所以作狀瞓覺，佢一叫我就即刻彈起。
黃毓民：你習慣喺會議中瞓覺？
黃定光：我唔覺。
黃毓民：咁你好習慣打瞌睡，攰就瞓？
黃定光：人之常情吖。
黃毓民：你嗰次就話扮瞓，咁其他呢？（指着「18睡相圖」）
黃定光：係事實。
黃毓民：啲相唔喺你屋企影嘅？
黃定光：全部都喺立法會。
資料來源：庭上證供