幾個月來嘅老友中午茶局，總不見公子L出現，呢日唔抵得，開聲問有冇人知道點解，餐飲M話公子L打高爾夫球多年，卒之背脊肌肉好似拉傷咗，周時要睇醫生，後來有人介紹一位「神醫」，「神醫」生意太好，著名影星係常客，只有一個期可以俾公子L，又剛啱與我地每星期飲茶時間相撞，故此公子L為了身體唯有捨我地而去。
打高爾夫球好似係好斯文嘅運動，永遠不會俾對手碰撞，但原來經年累月咁樣打波，身體一定受傷，程度當然因人而異。賓架T嘅阿哥與細佬都是中環名醫，見得病人多，對賓架T講：「個個學打波都自動睇CD、睇書，跟教練學習Swing嘅正確姿勢，但以我觀察，學習西方冠軍級人馬嘅姿勢有副作用。西人身高、體重、體質與我地華人相差甚遠，人地正確嘅姿勢與揮桿手法，未必與我地嘅體質對稱，學習得所謂正確姿勢越多，背脊越容易受傷。」
年過八十嘅工程師H聞言就有佢自己嘅評語：「我認為打高爾夫球係一種身體不平衡嘅運動，用右手嘅，全身永遠係由右向左，用左手揮桿，就永遠帶動肌肉由左向右，我地打網球、羽毛球、乒乓球都有正手、反手，肌肉不時向左或向右，於是移動得到均衡，高爾夫球就一味單向，可能對身體肌肉有害！」
是耶是非，要由體育創傷專家提供理論與實踐，不過朋友之中，愛好打網球與高爾夫球嘅，紛紛要睇醫生，就確係事實，最少去睇骨科、跌打、按摩嘅，就反而係左丁山，因為自己乜波都冇打，只是行路，正是生在黃帝膝，日日路上行，未免腳拂拂，健身高手郭思治教落，上斜行傷心，落斜行傷膝，盡量揀平路行，可保平安。唔信邪，可自舊山頂道嘉諾撒醫院經兵頭花園行落皇后大道中，膝頭唔軟嘅，恭喜晒！星期三晚，因有特別事，行咗一大段路再入快活谷馬場，在酒會碰到馬主P，佢話不久前特登去烏茲別克旅行，考察一帶係乜頭乜路，識咗一啲當地商人，左丁山笑佢幾早着先鞭，識得響應特區政府嗌破喉嚨咁推動一帶一路「商機」，點知馬主P又係嗰句：「佢地公司與私人都難在香港開銀行戶口！」唔，商界不少人如此說，據聞政府官僚已經聽到嘞，可能會向金融界徵詢意見研究簡化開銀行戶口之嚴苛要求，否則眼白白會睇見香港掘井，新加坡飲水！