何文田半山壹號最近錄得一宗蝕讓貨成交，半山徑33號一個實用面積1,252呎嘅高層單位，最近以2,000萬元賣出，實用呎價1.59萬元。
土地註冊處資料顯示，新買家登記名字乃車品覺（Chia Pun Kok Herbert），跟阿里巴巴前副總裁同名，好大機會係佢執平貨。
原業主姓伍，2008年向長實以2,192萬元，一手買入單位，經過8年時間，樓價曾火箭級上升，家陣賬面反而要蝕192萬元，連埋使費慘輸294萬元，夠買一個市區車位。𠵱家同類面積單位放盤叫價由近2,000萬到3,300萬元不等。
車品覺成功執到筍貨之外，早排尖沙嘴天璽有件蝕1,000萬元單位，買家就係太子珠寶鄧鉅明位公子鄧亦棋，佢以3,250萬元買入筍貨，單位991呎。