唔好嫌八方長氣呀，5月2號前記住登記做選民，皆因9月嘅立法會選舉好緊要，唔通大家唔想用選票發聲？與其靠政府宣傳，不如靠自己，7個團體近期籌辦「V4U」街站，特別悉心炮製選民登記包（圖），入面有選民登記表格、傳單同貼紙，方便大家攞住包包，游說朋友登記，有份開街站嘅青年新政成員話始終有啲圈子佢哋未必接觸到，希望靠大家一傳十、十傳百。
問到佢哋點睇政府嘅選民登記宣傳，尤其今年選舉事務處增加埋宣傳開支喎，約近1,700萬㗎，但有份設計選民登記包、讀緊視覺傳意嘅Crimson就批評，政府宣傳嘅選民登記廣告一啲都唔吸引，指「擺個日曆，加兩隻眼落去」嘅設計簡陋，質疑「佢咁都叫擺咗好多資源落去？我覺得接受唔到」。