【本報訊】二級歷史建築柴灣工廠大廈1959年落成，原來房委會資助房屋小組主席黃遠輝小學六年級時，也曾在柴灣工廈做暑期工製作校簿，如單行簿、格仔簿等，每日賺取5元薪金，幫補書簿費。黃遠輝前日與記者重遊舊地，「對呢座大廈好熟悉，仲有一定感情，𠵱家改裝做公屋，外貌幾乎同以前一模一樣」。
柴灣地膽 「仲認得個單位」
黃遠輝有房策「公職王」之稱，現為房委會資助房屋小組主席，與柴灣區結下不解緣。他自小在木屋區長大，約8歲搬到柴灣徙置區，其後入住同區公屋，及後購買居屋，「呢區非常熟悉，以前呢區冇咁多人流，主要都係工廠大廈」。
說起工廈，柴灣工廈滿載黃遠輝做暑期工的回憶，他透露小學六年級即約12歲時，曾在工廈內一個低層單位做暑期工，日薪5元，「48年前正正喺呢度做過暑期工，我仲認得嗰時做暑期工嘅喺低層單位，主要做學校啲校簿，好似單行簿、格仔簿，嗰時好多工序仲要人手」。
黃遠輝笑言，「嗰時做嘢唔覺得辛苦，我哋嗰個年代冇𠵱家咁多嘢玩，最多都係空地踢吓波，暑假就比較得閒，打吓工就可以幫補吓一年學費、書簿費」。
黃遠輝大讚柴灣工廠大廈現改裝成公屋，「整得幾好，外貌幾乎同以前一模一樣」。
■記者譚靜雯