堡獅龍創辦人羅定邦孫女羅君兒2,800萬元綁架案，轟動一時，原來唔經唔覺，本周係事件發生1周年。當時有份協助羅小姐處理危機嘅公關公司，正係金管局前傳訊總監、任總愛將陳民傑（Thomas）所創立嘅圓通財經公關。
咁啱Thomas噚日奪得MediaZone公關界最佳價值服務獎，佢同華華分享，話過去1年最難忘嘅工作，莫過於處理呢宗綁架案。
Thomas覺得，當事人剛毅勇敢，面對驟變依然充滿正能量，為社會與青年人樹立一個好榜樣。
仲記得羅君兒獲釋後召開記者會，Thomas細心打點一切，雖然伊人冇回答提問，初頭感覺cool cool哋，但隨着事件明朗，佢表現成熟冷靜又不失少艾純真，都令人記憶幾深。
講番Thomas，佢2009年隨任總退休離開金管局後，2013年開設圓通做老闆，經過幾年，總算做到成績，恭喜。